AHDATH.INFO
سامية أفريو الممثلة المغربية ماعرفات باش تبلات.
السيدة بغات تدير فيها "دادا الفهيمة" فهاد الشي ديال التلفزيون اللي كيدوز فرمضان قبل مايبدا رمضان، الساعة طبزات ليها العين.
سامية قالت فدوزيم بأن اللي ماعجبوش داكشي اللي كيدوز فرمضان فالتلفزيون مايتفرجش فيه. يمشي يقرا كتاب ولا يقلب لناشيونال جيرغرافيك يشوف الحيوانات أعز الله قدر الجميع.
الناس فمواقع التواصل ناضو لسامية واعتبروها من المستفيدات والمستفيدين من موجة الحموضة التلفزيونية فشهر الصيام وهاجموها بقرة وقالوا بأنها مافاهماش دور التلفزيون بعلاقتو بالناس، وأنها ناسية أصلا أن داكشي اللي كيدوز فتلفزيوننا حنا اللي كنمولوه من رزقنا، يعني عندنا الحق ننتقدوه.
سامية تحمسات شوية أكثر من اللازم، وحتى صحابها الفنانة قلبوا عليها وجههم واعتبروها زادت فيه.
كلهم تقريبا باستثناء محمد الشوبي اللي ماشي هو هداك هاد الأيام واللي قال أنه كيساند أقريو ضد اللي انتقدوها لأنهم - حسب التصور ديالو للأشياء - كايساندو الظلاميين بهاد الانتقاد اللي دارو لهضرة سامية
- [ ] المهم وباختصار رمضان وفراجتو باقية مابدات وشي وحدين دارو الفراجة فريوسهم وصافي، والله يحد الباس مع الحموضة اللي كلشي عارف أنها ولات موضة عند القرودة بحال اللي كيقولو شباب تيك توك اليوما.
- [ ] آراك للفراجة آهياتا...