AHDATH.INFO
مزيانة ديك القضية ديال « هيا نتحالف مع خوتنا فالإعلام المغاربي » و "هيا بينا نكتبو مواد موحدة" اللي كيدعيو ليها شي وحدين فينا، ولكن اللي أحسن منها نتفكرو أن الصراع اللي بينا هنا فالصحافة المغربية، وبين خوتنا فالصحافة الجزايرية هو صراع حول المساس بوحدتنا الترابية.
يعني حنا مامضاربينش معاهم على ماتش ديال الكرة، ولا على شي بقعة فالشوكة، ولا على شكون فينا يربح هاد الطرح فالكازينو، ولا يخسر هاد الماتش فالتيران، ولا يتعغلب فهاد الخطار فهاد القصارة…
لا، أوهو. خوتنا فالصحافة الجزايرية التابعة كلية للعسكر كيمسو وحدتنا الترابية، وكيسميونا المستعمرين، وكيقيلو يسبو بلادنا.
بحال هادو ماخاصناش نديرو ليهم الركادة ونقولو ليهم الكلام الإنشائي الزوين اللي ماكيوكلش طرف ديال الخبز.
بحال هادو، خصنا ندافعوا على بلادنا فوجههم بضراوة، وقوة، ومانرحموهمش، حتى يهديهم الله ويعرفو أن وحدة هاد البلاد مسألة مقدسة، وديك الساعة نديرو العراضة وتبادل الزيارات وشعارات الفريقين وداكشي وكلشي آسميتك
في انتظار تحقق هاد الحلم أو الوهم، هوما يدافعوا على عسكرهم، وحنا ندافعو على هاد البلاد الأمينة اللي غادية تبقا أمينة حتى تقوم القيامة، وسدات مدام…يلا بغات تسد طبعا.