AHDATH.INFO
حميد ماعجباتوش الاستقالة ديال المصطفى وقال ليك آسيدي « هادا لعب الدراري وصافي ».
حميد هو حميد المهدوي ديال « بديل » مسكين، والمصطفى هو مصطفى الرميد وزيرنا فحقوق الإنسان حتى هو مسكين، حيت احنا كلنا موساكن ودراوش وفوقارا تحت الله سبحانه وتعالى.
طيب آخويا حميد. علاش ماعجباتكش الاستقالة ديال الرميد؟
الصحافي المغربي اللي كيدير كل نهار برنامج سميتو « حديث داك النهار » (عندو حديث الإثنين وحديث الثلاثاء وحديث الأربعاء وحديث الخميس حتى هو) قال ليك « الرميد واخا مريض خصو يكمل خدمتو، وزايدون هو مامريض ماوالو، غير كيتفلا على الشعب المغربي وصافي.، وحتى كاع فرضا وافتراضا ونفترضو يلا كان مريض ماشغلناش، وحتى يلا مافتراضناش سميتو عليه فإنه لايعقل وصافي » حيت حميد ماكيملش الهضرة، ديما كيخليها فشي دورة ويزيد…
اللي فهم شي حاجة يدخل يتآبونا معانا فلاشين يوتوب ديالنا اللي مازال مادرناها، واللي ماعوالينش نديروها اعتمادا على هاد الشي اللي كنشوفوه فاليوتوب المغربي، واللي كيجعل أي إنسان كيحترم راسو يتخذ موقف واحد فقط لاغير: يهز جلابيتو ويزيد، مايعرفوه القوم فين مشا.