AHDATH.INFO
بزاف ديال الناشطين والناشطات، فمواقع التواصل الاجتماعي، من تريكت « ها النشاط هاهو شاط » ماعاجبهومش الحال آسميتك، وكاعيين بالصح علاش الندوة ديال المغنية المغربية سعيدة شرف حضر ليها واحد العدد عديد ديال وسائل الإعلام مسكينة، كيفوق العدد اللي حضر لتغطية البرلمان من نهار بدات القبة التشريعية فالعمل فبلادنا المغرب.
الناشطين والناشطات المغيارين والمغيارات، كعاو بزاف، ماشي شوية، وقالوا « هادا دليل على أن المواقع الجاهلة والجورنانات الأكثر جهلا منها، مابقا عندها مايدار، وولات فعلا عاطية ميكروفوناتها لمن والا، وهادا برهان على أن الصوحافة المغربية (الزغيبية) سالات صافي وسدات هي ومدام بجوج، وبأن جيل الضباع اللي هضر عليه واحد النهار عالم الاجتماع كسوس، صافي ولد لينا ضبيعات صغيورين، ولاو دايرين مابغاو فالبلاد والعباد » وبقية ديك الهضرة الغليضة راكم عارفينها
حنا فالساخرة ضد تغلاض الهضرة. عزيز علينا الراطير، يعني أرض/ أرض، وتمشي معانا بالشوية.
السيدة اللي سميتها سعيدة جاية باش تهضر على موضوع مهم جدا جدا جدا سميتو « حمزة »، وكنيتو « مون بيبي ». لذلك كيف لايوعقال سيدي القاضي أن وسائل الإعلام الوطنية ماتجندش الأطقم ديالها بشكل استثنائي وماتسيفطهاش باش تسمع مولات « أماني » و » ولد مو » وبقية الروائع السمفوكية آشنو باغية تقول بالتحديد؟
ختي سعيدة، ماتديهاش فهضرة الناشطين والناشطات المغيارين والمغيارات، ومبارك ومسعود هاد الشي اللي درتي ومبارك ومسعود نجاح الندوة، وفانتظار الملتقى الإعلامي المقبل ديالك، ولا عرفتي شنو يجيك مليح آمسخوطة؟؟؟
نظمي لينا شي مناظرة ديال الإعلام فالمغرب، راه وزير الاتصال مسكين عثمان بغا يديرها وماقدرش.
آش بان ليك فهاد البريكول حتى هو؟