AHDATH.INFO
خونا فالله اللي كان شحال هادي رايس الحكومة هربان ليه وغادي يهربو للناس أجمعين.
عبديلاه يقصف من جديد، وهاد المرة بورقة بخط اليد نسا ماكتبش فيها الرقم ديال لاكارط ناسيونال حيت ندم وحطو الرقم المرة الأخرى، وهاد المرة أعلن فيها التراجع ديالو عن التعهد اللولاني بقطع العلاقات الديبلوماسية مع صحابو وعشرانو فالحزب، أو مايصطلح عليه فالمغربية القديمة « التطاويس » أو « فضيتك » أو « ماتبقاش تهضر معايا عافاك ».
ابن كيران ضرب الشعب عاوتاني برسالة، قال فيها بأنه مابقاش مطاوس صحابو، وأنه غادي يكتفي بتأكيد البقية يعني باقي غضبان من الحزب ولكن مع العشران الدنيا هانية
دابا داخلنا عليكم بسيدي ربي، واش كاين شي واحد من هادوك اللي تيمشيو عند عبديلاه للدار، سوا سي نبيل ولا مسكين بلكبير ولا مانعرف شكون ينصحو ويقول ليه « آعبديلاه دير عقلك الله يهديك »؟
حنا فالساخرة مستعدين نديروها ونمشيو عندو حتى لليمون، غير هو خفنا مايحلناش الباب ويكتب شي برية عاوتاني جديدة يعلن فيها شي فضيحة أخرى
الحاصول ومافيه: الله يقاد العقل والصحة مع العمر وصافي آسميتك