AHDATH.INFO
بدينا عاوتاني ديك البسالة ديال « مشيتي فيها ».
دابا هذا برنامج المغاربة كلهم متفقين على أنه مخدوم. الممثلين اللي فيه عارفينو مخدوم. الضيوف ديالو عارفينو مخدوم. المشاهدين الأفاضل الكرام عارفينو مخدوم.
جوج ديال الناس فالقناة الثانية « دوزيم » اللي ماعارفينوش مخدوم: منتج البرنامج وداك اللي كيعطيه هاد البريكول كل عام
الحلقة الأولى ديال « مشيتي فيها » هاد العام اللي كانت ضيفتها سعيدة شرف كانت باسلة ومفروشة بحال حلقات السنوات الماضية، ولكن هاد الأمر ماشي مهم بالنسبة لدوزيم اللي كتقول كل عام بأن الكاميرا غير الخفية ديالها حققات أعلى نسب المشاهدة من المغرب حتى للمريخ، وكتصر كل عام أنها تعطي للمغاربة الدليل على أنها قناة ولات عاجزة عن الإبداع والتجديد، وكل عام كتدبر على نفس البريكول لأسباب باينة جدا ومفروشة بزاف وماشي كاشي غير باش يدوز الكاشي
المشكلة هي أن الناس هاد العام كالسين بالسيف عليهم فديورهم، يعني ماتزيدوهومش فقصة الرداءة على فقصة سدان الجوامع والقهاوي آلمطورين اللي شادين ديك القناة ودبرو ريوسكم عاوتاني، واش حنا نعرفو أحسن من الطبيب؟