شرعت وزارة العدل في إعداد مشروع جنائي خاص بالتظاهرات الكبرى، التي سيحتضنها المغرب مستقبلا، وفي مقدمتها مونديال 2030، الذي تنظمه المملكة المغربية بشكل مشترك مع إسبانيا والبرتغال.
وقال عبد اللطيف وهبي خلال جلسة الأسئلة الشفوية لمجلس النواب أمس الإثنين: “الإشكال اللي عندنا في المونديال هو أن عدة دول غادية تحضر، ومواطنو عدة دول غايجيو باش يتفرجو، ويحتافلو، ومن الطبيعي توقع لينا مشاكل بحال العنف الصغير وتبادل الشتم والسكر البين.. واش إلا شي مشجع دار هاذ الفعل نديه للكوميسارية ومن الكوميسارية نديه للسجن.. شحال غايقدنا نديو من واحد للسجن، را غادي يجيو المشجعين من العالم كامل لحضور كأس العالم بالمغرب أشنو غادي ندير؟”.
وتابع وزير العدل حديثه قائلا: “ناقشنا هذا الموضوع، واتصلنا ببعض الدول اللي نظمت كأس العالم، وسافرت ليها، وجلسنا معاهم، وشفنا التجارب ديالهم، وقررنا وضع قانون ينظم الوضعية الجنائية أثناء التظاهرات الدولية، ويحدد كيفية التعامل مع الجرائم العادية ماشي الجرائم الكبرى”، قبل أن يشير إلى أنه “في كل ملعب يحتضن مباراة من مباريات المونديال ستكون هناك لجنة يرأسها السيد وكيل الملك، وتضم الأمن الوطني والدرك الملكي وباقي الأجهزة المعنية، باش إيلا شي واحد دار شي جريمة يقدموه تم تم ويستامعو ليه تم تم ويدار ليه محضر تم تم دلخل الملعب”.
وأضاف عبد اللطيف وهبي أن “المسألة الثانية هي أننا غانديرو ليه محضر، ونقومو بواحد الإجراء سميتو الإبعاد لبلادو، ويمشي يتحاكم فبلادو، ما عندي ما ندير بيه هنا. غانديرو ليه محضر ونسيفطوه بالمحضر ديالو يتحاكم عندي ما ندير بيه هنا في الكوميسارية ولا في السجن”.
وشدد وزير العدل على أن “الخطير هو أن هذا، اللي عتقلتي ما عرفتيهش كي داير من الناحية الصحية، يمكن تشدو لأنه دار واحد الفعل جرمي وتديه للكوميسارية، ويموت ليك في إيديك، إما لأنه مريض، أو فيه السكر وما شربش الدوا ديالو، وغايولي الموضوع هو هذا اللي مات عندك ماشي الحدث الكبير اللي هو كأس العالم والمباريات”.
“قررنا ملي نعتاقلو شي واحد نعطيوه للدولة ديالو، وإيلا دار شي مخالفة بسيطة وفيها غرامة يخلصها ويمشي فحالو”. هذا ما أكده وزير العدل، قبل أن يوضح أن “هذا القانون غايستافد منو غير اللي عندو بطاقة الدخول للملعب، يعني جاي للمغرب باش يتفرج في الماتش ماشي جاي من أجل السياحة أو لغرض آخر”.
وأشار عبد اللطيف وهبي إلى أنه هناك مشكلا آخر سيعالجه بدوره مشروع القانون الجديد ويتعلق الأمر بحالة قيام لاعب أحد المنتخبات المشاركة في نهائيات كاس العالم بالمغرب بارتكاب فعلي جرمي وخرق القانون، قبل أن يتساءل “واش نهزو نديه لبلادو، را مازال ما كملو المباريات”.
وختم وزير العدل حديثه عن مشروع القانون الذي سيعالج الجرائم المرتكبة خلال المونديال وغيره من التظاهرات الرياضية الكبرى التي سيحتضنها المغرب قائلا:ة “حنا وجدنا واحد التصور، ودرنا واحد الورقة، وغانجيبوها ليكم للبرلمان، وغادي يكون عندنا قانون خاص بالتظاهرات الدولية باش تدوز الأمور في أحسن الظروف الممكنة”.
